Jólasoul í Hoyvíkar kirkju

Fjórða sunnukvøld í advent, 22. desember, kl. 20 verða Jólasoul at hoyra í Hoyvíkar kirkju.

Talan er um jólatónleik frá fimm av fremstu sangarinnunum í Føroyum.

Jasmin Mote (jazzygold), Marianna W. Nagata (Marianna Winter), Dania O. Tausen, Katrina Olsen (Katari) og Anna Sofía Skoradal (gówa), umframt SWAY. Saman kalla tær seg JÓLASOUL!

Jólasoul hava júst givið út nýggja jólaplátu, sum tær eisini hava framleitt.

Í hesum sambandi vóru tær í sendingini LEITISSTEIN í útvarpinum og greiddu frá um nýggju plátuna. 

Leitisstein, Jólasoul

>>Lurta eftir: LEITISSTEIN 03.12.2024 (Jólasoul)

Byrjaðu fyri fýra árum síðani

Jasmin, Marianna, Dania, Katrina og Anna Sofía (tó upprunaliga Tamara Mneney) hava seinastu fýra árini skipað fyri egnari jólakonsert við heitinum Jólasoul, og framført fyri fullum salum í bæði Reinsarínum og Norðurlandahúsinum.

Sangarinnurnar í Jólasoul eru kendar frá óteljandi ymsum tónleikaverkætlanum undir egnum navni og í ymiskum bólkum.

Styrkin hjá Jólasoul sigst vera ymiskleikin, sum tær hvør sær standa fyri, og sum spælir so sera væl saman á pallinum og í ljóðmyndini.

Egin løg og egnar útsetingar

Tær framføra egnar útsetingar og týðingar av alskyns jólaløgum á føroyskum, norskum, enskum, donskum og íslendskum, og tær gera eisini nógv burturúr kórútsetingum til ymsu løgini.

Við sær hava tær eitt húsorkestur við navnframu tónleikarunum Vár Miðberg (trummur), Karl Andrias Stórá (bass), Kristian Pauli Ellefsen (klaver), Vinjar Egilsnes Petersen (synth) og Ari Johannesen (gittar).

Jólasoul hava verið nógv róstar øll árini. Áhoyrarar hava lýst tær at vera júst tað, sum skuldi til fyri at koma í rættan jólahýr.