TV2: Ein deyður og ein í lívsvanda eftir spreinging umborð á Glyvursnesi

Tríggir mans vóru í maskinrúminum á Glyvursnesi, tá ein spreinging hendi í maskinrúminum um 21 tíðina í kvøld. 

Hetta boðaði Smyril Line frá í stuttum tíðindaskrivi í kvøld. 

Menninir vóru fluttir á sjúkrahús. 

Danski tíðindamiðilin TV2 skrivar nú á heimasíðuni, at ein persónur er deyður av løstunum, ið hann fekk av spreingingini, meðan ein annar er í lívsvanda. 

TV2 skrivar eisini, at báðir persónarnir eru úr Føroyum. 

Tað váttar Torben Arendrup, ið er vaktleiðari hjá politinum í Norðurjútlandi, fyri TV2. 

Tann triði, ið var í maskinrúminum, er sloppin væl frá vanlukkuni við smærri snuddum og roykeitran. 

Politiið fekk fráboðanina um spreingingina klokkan 21.02 føroyska tíð, og klokkan 22.40 boðaði Nordjyllands Beredskab frá, at eldurin umborð var sløktur.

TV2 ger vart við, at tey avvarandi eru kunnaði. 

Dagføring......

Danmarks Radio skrivar nú á heimasíðuni, at maðurin, ið lat lív í vanlukkuni, er í trýati árunum, meðan maðurin, ið er illa løstaður og í lívsvanda, er í fýrati árunum.