Kanadiski forsætisráðharrin leggur kanska frá sær

Kanadiski forsætisráðharrin Justin Trudeau er komin undir alsamt størri trýst seinastu tíðina, og nú verður gitt, at hann møguliga fer at leggja frá sær seinni í hesi vikuni.

Sambært kanadiska miðlinum Globe and Mail kann tað henda longu fyri landsfundin hjá Liberala flokkinum, sum verður mikudagin.

Síðan Donald Trump vann amerikanska forsetavalið í november, hevur hann tosað niðrandi um Kanada, og hevur millum annað kallað Justin Trudeau fyri "guvernør í stóra statinum Kanada" - so at skilja, at Kanada bert er at rokna sum ein statur í USA.

Ov veikur

Kanadiskir politikarar halda, at Trudeau hevur verið ov veikur mótvegis Trump, og í minsta lagi sjey tinglimir í hansara egna flokki hava alment heitt á Trudeau um at leggja frá sær.

53 ára gamli Justin Trudeau tók við sum leiðari í Liberala flokkinum í 2013, og hann hevur verið forsætisráðharri síðani 2015.

Tjóðartingsval verður í Kanada í oktober, og sum nú er vísa meiningakanningar, at Liberali flokkurin fer at tapa stórt fyri Konservativa flokkinum, sum stendur til at vinna valið.