"Seinasta paradís á jørð" frumsýndur á størstu filmsstevnu í Norðurlondum

Filmsstevnan í Gøteborg hevur í dag kunngjørt, at nýggi filmurin hjá Sakaris Stórá, "Seinasta paradís á á jørð", er á Nordic Light skránni hjá teimum

Uni L. Hansen

07.01.2025 - 16:15

"Seinasta paradís á jørð" kallast nýggi filmurin hjá føroyska filmsleikstjóranum Sakarisi Stórá.

Filmurin er liðugur og byrjar at ganga í Havnar Bio 10. apríl, og atgongumerki til sýningarnar eru komin til sølu á bio.fo

Men longu nú boðar filmsstevnan í Gøteborg frá, at "Seinasta paradís á jørð" er sloppin upp í part á Nordic Light skránni hjá teimum.

Hetta boðar framleiðslufelagið Kykmyndir frá í tíðindaskrivi.

Størsta norðurlendska filmsstevna

Filmstevnan í Gøteborg er størsta filmsstevna í Norðurlondum og hevur yvir 270.000 vitjandi.

Harumframt vitja 2.200 filmsfólk frá yvir 50 londum sølustevnuna Nordic Film Market, ið er knýtt at filmsstevnuni.

Filmurin, ið hevur fyrstu almennu sýningina í Føroyum í Havnar Bio 10. apríl, fær viðmæli í skránni sum verandi hugtakandi og hjartanemandi.

Frumsýningin verður í Bio Roy í Gøteborg 29. januar, umframt at filmurin eisini verður sýndur á Nordic Film Market dagarnar eftir.

Um "Seinasta paradís á jørð"

Seinasta paradís á jørð, The Last Paradise On Earth

"Seinasta paradís á jørð" er ein rørandi uppliving, ein løtumynd av einum heimi í broyting. Filmurin samantvinnar søguna um lívið sum verkafólk í eini lítlari føroyskari bygd við persónligu menningarsøguna hjá høvuðspersónunum, unga Kára (Sámal H. Hansen) og systrini Silju (Bjørg B. Egholm).

Í filminum roynir Kári at finna sítt pláss í eini tilveru, har lívisins umstøður, kærleikin, vinir og samfelagsviðurskifti hála í hann.

Filmurin gongur fyri seg í eini broytingartíð, har færri og færri verða búgvandi á smáplássunum. Men Kári er heimkærur. Hann trívist í tí einfalda lívinum í bygdini. Hann og systirin Silja syrgja í tøgn um mammuna, ið tey hava mist. Kári finnur troyst í arbeiðinum á flakavirkinum, meðan Silja stríðist við at megna skúlagongdina. Samstundis sum pápi teirra (Hans Tórgarð) ikki megnar gerandisdagin í heiminum og rýmir til skips og til tryggu og kendu karmarnar umborð. Men flakavirkið er hótt av at verða stongt, og við tí verður tilverugrundarlagið í bygdini broytt.

Tað er Sakaris Stórá, ið leikstjórnar. Hann fekk sítt gjøgnumbrot í 2017 við spælifilminum "Dreymar við havið". Men hann var áðrenn hetta nógv fagnaður fyri stuttfilmarnar "Summarnátt" og "Vetrarmorgun", umframt norska stuttfilmin "Passasjeren".

Sakaris hevur somuleiðis skrivað handritið í samstarvi við Tommy Oksen og Mads Stegger. Hin virðislønta Virginie Surdej er fotografur á filminum.
Filmurin er framleiddur av Jón Hammer fyri Kykmyndir og Adomeit Film við stuðli frá Danska Filmsgrunninum, FilmFyn, DR og miðlaskránni hjá Creative Europe, Mentamálamálaráðnum, Vinnumálaráðnum og Filmshúsinum.”