Føroyar serligt dømi um koppseting

Tað stendur í eini nýggjari vísindaligari greining av, hvussu pneumokokksjúka hevur ment seg í Føroyum seinastu 23 árini, skrivar Granskingarráðið á heimasíðu síni.

Pneumokokksjúka er ein álvarslig sjúka, ið kann elva til lungnabruna, meningitis og blóðeitran.

Sjúkan rakar serliga tey veikastu - børn og eldri, og tí hevur koppseting verið ein týðandi liður í at minka um talið av sjúkutilburðum.

Millum annað vísir tað seg, at síðan pneumokokkkoppsetingin varð tikin við í koppsetingarskránna í 2010, eru tilburðir av pneumokokksjúku millum børn undir fimm ár burtur, og hetta vísir, hvussu væl koppsetingar kunnu verja tey yngstu. 

Tó hava nýggjar pneumokokk undir-typur, sum ikki verða vardar av verandi koppseting, tikið seg upp, og tað rakar serliga tey eldru.

Heilsustrategi má endurskoðast
Staðfest verður, at koppsetingar bjarga lívum, men eisini, at neyðugt er at vera á varðhaldi, tí bakteriur laga seg altíð eftir nýggjum viðurskiftum.

Heilsustrategiin má javnan endurskoðast, og neyðugt er við nýggjari og breiðari koppsetingum, umframt serligum átøkum fyri eldri.

Arnfinnur Kallsberg, sum er ph.d.-lesandi á Roskilde Universitet, er fyrstihøvundur á greinini, sum er partur av ph.d.verkætlan hansara.

Vegleiðararnir og viðhøvðundarnir eru Shahin Gaini, professari, knýttur at Landssjúkrahúsinum og Fróðskaparsetrinum, Hans-Christian Slotved, seniorgranskari á Statens Serum Institutti, og Karen Angeliki Krogfelt, professari á Roskilde Universiti. 

Granskingarráðið stuðlar verkætlanini.

Greinin, sum stendur í Infectious Diseases, kann lesast her: “A nationwide study of two decades of invasive pneumococcal disease in the Faroe Islands, 2000–2023”