Ein av størstu donsku byggifyritøkunum ætlar at keypa Articon

Tað er ein av størstu byggifyritøkunum í Danmark, Per Aarsleff Holding A/S, sum eftir ætlan skal keypa 80 prosent av Articon, ið seinnu árini hevur verið størsta byggifyritøka í Føroyum. 

Í fjør hevði Per Aarsleff Holding A/S á 21,7 milliardir krónur í umsetningi, og avlopið fyri skatt var 1,1 milliard krónur. 

Virksemið hjá felagnum er savnað í 62 dótturfeløgum, sum hava heimstað í 14 londum. 

Harímillum eru øll Norðurlond uttan Føroyar. Sostatt verður Articon fyrsta royndin hjá felagnum at fáa fótafesti í Føroyum. 

Articon, byggifelagið Articon, byggifelag

Articon hevur ment seg til at vera størsta byggifyritøka í Føroyum. 

Dótturfelag sett í samband við svik

Eitt av dótturfeløgunum, Dan Jord, er í hesum døgum sett í samband við tað, sum danska kringvarpið skrivar, er størsta mál í Danmark um pengasvik móti einum almennum bústaðarfelagi. 

Í málinum, sum býrætturin í Aarhus viðger í løtuni, eru fýra menn ákærdir fyri heimildarsvik við at misbrúka sítt arbeiði til at fáa fyrimunir av ymiskum slagi. 

Mett verður, at teir hava svikið almenna bústaðarfelagið Østjysk Bolig fyri umleið 24 milliónir krónur frá 2010 til 2020.

Ein av teimum fýra monnunum var í hesum tíðarskeiðinum, sambært TV2, stjóri í Dan Jord, sum er dóttirfelag hjá Per Aarsleff Holding A/S. 

Per Aarsleff Holding A/S

(Mynd: Per Aarsleff Holding A/S)

8.800 starvsfólk

Per Aarsleff Holding A/S varð stovnað í 1947, og umleið 8.800 fólk arbeiða í felagnum í dag. 

Avtala er gjørd um, at felagið keypir 80 prosent av Articon fyri 144 milliónir krónur, treytað av at Kappingareftirlitið góðkennir keypið.

Kringvarpið hevur roynt at fáa samrøðu við Per Aarsleff Holding A/S, hvørjar ætlanir felagið hevur í Føroyum, men felagið vil einans svara skrivligum spurningum.