Jóhanna Norðberg Niclasen við í danska Melodi Grand Prix

Nei, tað er eingin yvirsjón ella sjónhvørving, at tað nú er kunngjørt, at Jóhanna Norðberg Niclasen úr Havn skal luttaka í danska Melodi Grand Prix. 

Tað skal Jóhanna, sum vit her heima kanska best kenna undir pallnavninum Sissal Jo, við sanginum "Hallucination". 

Nú er Jo strikað, og Jóhanna Norðberg Niclasen eitur bara Sissal. Um nakar ivast í navninum, so er Jóhanna doypt Sissal Jóhanna Norðberg Niclasen. Harav Sissal Jo, og nú bara Sissal. 

Jóhanna Norðberg Niclasen, Malthe Johansen, Chris Chordz, Lina Spangsberg, Marcus Winther-John og sviarnir Linnea Deb og Melanie-Wehbe hava skrivað sangin "Hallucination."

"'Hallucination' snýr seg um at hitta eitt menniskja, har sambandið kennist so gott, at tað næstan kennist óveruligt," greiðir Jóhanna Norðberg Niclasen frá á heimasíðuni hjá Danmarks Radio, dr.dk. 

Jóhanna sigur eisini, at hóast hon ikki beinleiðis kemur frá einari musikalskari familju, so hevur mamman fortalt sær, at hon byrjaði at syngja, áðrenn hon dugdi at tosa. Og longu sum tíggju ára gomul stóð Jóhanna fyrstu ferð á palli til barna-prix, ið hon vann. 

Jóhanna Norðberg Niclasen sigur við DR, at hon vónar, at hon kann vera við til at skapa eina Melodi Grand Prix-veitslu, men eisini at fólk kunnu spegla sær í sínum tónleiki og persóni. 

"Eg vil vísa, at tú kanst vera lekkur og sunn, hóast tú ikki ert kløn, og so mæli eg øllum til ikki at smæðast við seg sjálv og sínar dreymar."

Melodi Grand Prix, Sissal Jo, Sissal, Jóhanna Norðberg Niclasen

Ida Marie Odgaard/Ritzau Scanpix