Heilsuhjálparafelagið hevur steðgað samráðingunum

Heilsuhjálparafelag Føroya hevur steðgað samráðingunum við Kommunala Arbeiðsgevarafelagið, og felagið umhugsar nú støðuna.

Tað sigur Heilsuhjálparafelagið í tíðindaskrivi fyri løtu síðan.

Samráðingarnar skuldu halda fram í dag, har Kommununala Arbeiðsgevarafelagið skuldi leggja fram eitt uppskot um semju, men fundurin bleiv slitin eftir bert 20 minuttum, skrivar Heilsuhjálparafelagið.

Nógv krøv

- Uppskotið frá Kommunala Arbeiðsgevarafelagnum var ein long røð av krøvum, um at okkara limir skuldu geva frá sær vunnin rættindi, uttan at fáa nakað afturfyri. Tí steðgaði eg fundinum, sigur Mary Antonsdóttir, forkvinna í Heilsuhjálparafelag Føroya, í tíðindaskrivinum.

- Uppskotið, ið kom á borðið í dag, ger seg somikið nógv inn á okkara rættindi, at har var einki grundarlag at samráðast víðari. Nú umhugsa vit næsta leik væl og virðiliga, sigur Mary Antonsdóttir.

Eingin nýggjur fundur er á skránn í løtuni.