Ógreitt hví bilurin koyrdi inn í mannamúgvuna

Enn er ikki greitt, hví ein 24 ára gamal maður úr Afghanistan koyrdi inn í eina mannamúgvu í suðurtýska býnum München tíðliga fyrrapartin.

Sambært Der Spiegel kom maðurin til Týsklands í 2016 og bað um friðskjól, men tað fekk hann ikki. Síðani hevur hann havt eitt sonevnt toleransu-loyvi, sum ger, at avgerðin um at vísa honum av landinum aftur er útsett.

Í minsta lagi 28 fólk fingu skaða, summi av teimum álvarsligan skaða, men enn er einki sagt um, at nakar hevur latið lív.

München

Kann ávirka valið

Val verður til týska samveldistingið 23. februar, og roknað verður við, at hendingin í dag fer at hava við sær, at tilflyting fer at seta upp aftur størri dám á valstríðið og valið.

Samveldiskanslarin Olaf Scholz í sosialdemokratiska flokkium SPD og Friedrich Merz, sum er leiðari í kristindemokratiska flokkinum CDU, hava báðir talað fyri at herða krøvini fyri tilflyting til Týsklands. 

Báðir menninir vita eisini, at høgravíðgongda Alternative für Deutschland, sum hevur tilflyting sum eitt av sínum høvuðsmálum, hevur havt stóra framgongd í veljarakanningum og stendur til at gerast næststørsti flokkur í samveldistinginum.