Umboðsmaðurin viðger ikki klagu um próstasetan

Løgtingsins Umboðsmaður fer ikki at viðgera eina klagu um eina kæruavgerð hjá Almanna- og mentamálaráðnum í sambandi við setan av nýggjum prósti.

Talan er um málið, har fimm prestar kærdu bisp fyri at seta Ova Brim í starv sum próstur. 

Teirra fatan var, at lógin greitt tilskilar, at bispur skal innstilla tríggjar umsøkjarar til landsstýrisfólkið at taka støðu til.

Átta umsóknir vóru til próstastarvið, men setanarbólkurin setti Ova Brim uttan at hava fingið nakrar aðrar innstillingar.

Hanna Vang, løgtingsins umboðsmaður

Hanna Vang er Løgtingsins Umboðsmaður. 

Staðfesti avgerðina hjá bispi

Almanna- og mentamálaráðið staðfesti avgerðina hjá biskupi við teirri grundgeving, at fólkakirkjan ikki er partur av almennu fyrisitingini, men síðani fór málið víðari til Løgtingsins Umboðsmann.

Men Umboðsmaðurin sigur seg ikki kunna viðgera klaguna uttan eisini at fyrihalda seg til setanarmálið. Og sambært grein 4 í umboðsmanslógini er virksemi umboðsmansins avmarkað organisatoriskt til at fevna um stovnar innan fyrisitingina undir heimastýrinum.

Støða fólkakirkjunnar innan fyrisitingina er sambært Umboðsmanninum ov ivasom og ikki nóg greitt ásett í lóggávuni, at Umboðsmaðurin metir seg kunna viðgera kæruna.

Ovi Brim tók við sum próstur 1. mars 2024.