Trý ár síðani russisku innrásina í Ukraina

Útlendskir heimsleiðarar eru í ukrainska høvuðsstaðnum í dag

Fleiri heimsleiðarar eru komnir til Kyiv, í sambandi við at trý ár eru liðin, síðani Russland gjørdi innrás í Ukraina. Her eru leiðararnir avmyndaðir saman við Zelenskyj, forseta.

Mynd: NTB/Ritzau Scanpix

Tordis Vang Guttesen

24.02.2025 - 13:18

Fyri trimum árum síðani gjørdi russiski herurin innrás í Ukraina, og kríggj brast aftur á í Evropa.

Í 2014 hertók Russland Krim-hálvoynna, og stutt eftir eisini landspartarnar Donetsk og Luhansk.

Árini eftir vóru merkt av ófriði millum Ukraina og Russland. Kortini var ikki væntað, at russiski herurin beinleiðis fór at gera innrás í Ukraina tann 24. februar 2022.

Ætlanin var at hertaka alt landið, men av tí at Ukraina gjørdi mótstøðu, eydnaðist hetta ikki, og í dag hevur kríggið vart í trý ár.

Nógvan stuðul úr vesturheiminum

Ukraina hevur fingið umfatandi stuðul frá vesturheiminum í stríðnum, og millum størstu stuðlarnar eru Evropa og USA, ið hava fíggjað meginpartin av hermegini, umframt at veita fíggjarliga og humanitera hjálp.

Í síðstu viku vóru friðarsamráðingar millum USA og Russland í Saudiarbia um friðaravtalu og vápnahvíld, men ukrainar vóru ikki við. Zelenskyj, forseti, hevur sagt, at eingin friðaravtala verður góðtikin uttan at Ukraina er við.

Í dag hittast fleiri ríkisleiðarar í Kyiv, í sambandi við at trý eru liðin, síðani Russland gjørdi innrás í Ukraina. Teirra millum er Metta Frederiksen, ið umboðar Danmark.

Í hesum sambandi hevur Danmark júst latið tvær milliardir kr. til styrkja hermegina hjá Ukraina.