Umboðsmaðurin mælir til at gera nýggja lóggávu um fiskiloyvi

Løgtingsins umboðsmaður heldur, at ivi er um fiskiloyvi hjá bátum í bólki 5.

Umboðsmaðurin heitir tí á Fiskivinnumálaráðið um sum skjótast at gera lóggávu, sum skipar viðurskiftini við fiskiloyvi 5A og 5B, tá rættindahavari fær sær annan bát.

Málið byrjar, tá Fiskivinnumálaráðið staðfesti avgerð hjá Vørn um ikki at geva einum bátseigara fiskiloyvi 5A, sum hann søkti um, men gav honum fiskiloyvi 5B. 

Fyri at fáa fiskiloyvi 5A krevst, at báturin hevur avreitt fyri minst 200.000 kr.

Avreiddi við øðrum báti

Tað hevði bátseigarin gjørt. Men tað var við einum øðrum báti. Nú hevði hann fingið sær nýggjan bát. 

Og fiskiloyvið fylgir bátinum, ikki eigaranum, siga Vørn og Fiskivinnumálaráðið. 

Umboðsmaðurin sigur seg ikki hava grundarlag fyri at siga, at ivasama siðvenjan hjá Vørn beinleiðis fer út um heimildina í sjófeingislógini og í kunngerðini.

Umboðsmaðurin ger tí ikki meira við ítøkiliga málið.

Men av tí at umboðsmaðurin heldur, at talan er um lýti í lóg og kunngerð, er fráboðan send løgtinginum og landsstýrisfólkinum í fiskivinnumálum.