Kaldir og heitir hyljar uttan fyri svimjihøllina

Bæði tann heiti og tann kaldi hylurin uttan fyri svimjihøllina í Gundadali verða eftir ætlan tiknir í nýtslu seinni í hesi vikuni.

Tað sigur Eyðun Húsgaarð, leiðari í svimjihøllini í Gundadali í Havn.

Umhvørvisstovan hevur annars í dag góðkent útbyggingina av svimjihøllini í Gundadali.

Svimjihøll í Havn

Fimm hyljar

Útbyggingin fevnir um teir fimm nýggju hyljarnar: langhylin, vatnvenjingarhylin, heita hylin, kalda hylin og gosbaðið. Hvør hylur hevur sína egnu reinsiskipan, sum tryggjar gott vatn hjá brúkarunum.

Góðkenningin setur krøv til vatngóðsku, reinsiskipanir, goymslu og nýtslu av kemikalium, umframt regluligt eftirlit, soleiðis at heilsufrøðiliga støðan er í lagi.

Tórshavnar kommuna eigur og rekur svimjihøllina, og Umhvørvisstovan hevur eftirlit við hyljunum fyri at tryggja, at krøvini í góðkenningini verða fylgd.

Gomlu hyljarnir í svimjihøllini í Gundadali eru ikki góðkendir, men Eyðun Húsgarð sigur, at arbeitt verður við at fáa tað gjørt.