Uttanríkisstjórin í ES finst hvassliga at Putin

Uttanríkisstjórin í ES, Kaja Kallas, finst hvassliga at treytunum, sum Russland og forsetin, Vladimir Putin, hava sett fyri vápnahvíld í Ukraina.

- Krøvini hjá Russlandi vísa, at Moskva vil ikki hava frið í Ukraina, sigur Kallas við Reuters.

Hon sigur, at krøvini frá Russlandi samsvara neyvt við endamálið hjá Russlandi at leypa á Ukraina í 2022.

Russland krevur trygd fyri, at Ukraina ikki fer upp í verjusamgonguna Nato, og at Russland sleppur at varðveita landaøkini, sum tað hevur rænt. 

Russland hevur eisini gjørt greitt, at tað undir ongum umstøðum fer at góðtaka friðarvarðveitandi herdeildir úr øðrum londum í Ukraina.