Greenpeace dømt at rinda 4,5 milliardir í endurgjaldi

Umhvørvisfelagsskapurin Greenpeace er dømdur at rinda meir enn 660 milliónir dollarar - tað eru 4,5 milliardir krónur í okkara pengum - í endurgjaldi til amerikansku fyritøkuna, Energy Transfer.

Hetta hevur eitt nevningating gjørt av nú í nátt okkara tíð, skrivar DR.

Greenpeace í USA er dømt fyri millum annað ærumeiðing og at ganga annans mans ogn ov nær í sambandi við mótmæli móti oljuleiðingini Dakota Access í statinum North Dakota.

Rørleiðingin, sum er góðar 2000 kilometrar long, kann flyta stórar mongdir av olju úr North Dakota heilt til Illinois.

Kann dálka drekkivatnið

Bøndur, umhvørvisfelagsskapir og upprunafólkið í USA hava øll mótmælt oljuleiðingini, millum annað tí stúrt verður fyri, at hon kann dálka drekkivatnið í umráðnum.

Greenpeace hevur fyrr sagt, at eitt stórt endurgjaldskrav kann føra til, at felagsskapurin fer av knóranum. Ætlanin er at skjóta dómin inn fyri hægri rætt.

"Stríðið móti Big Oil er ikki av. Vit vita, at sannleikin og lógin er í okkara parti", sigur Greenpeace við CNN.