Danska stjórnin er kanska sinnað at stuðla byggingini av Suðuroyartunnlinum

"Tað verður ein samráðing millum løgmann og meg og ikki her í fólkatinginum."

Tað segði Mette Frederiksen, forsætisráðharri, tá Anna Falkenberg, fólkatingslimur, spurdi, um statskassin vil lata lán til Suðuroyartunnilin.

Mette Frederiksen var eisini spurd, um løgmaður hevur tosað við hana um eitt tílíkt lán:

"Eg havi sum prinsipp, at mær dámar ikki at tosa um tað, ið eg tosi við aðrar stjórnarleiðarar um, her í Fólkatinginum, og tað er eisini galdandi fyri løgmann."

Stór sparing í statsláni

Anna Falkenberg vísti á, at eitt statslán kann spara Føroyum millum 400 og 800 milliónir krónur í rentum.

"Yvirskipað, so hevur stjórnin tann hugburð, at øll hjálp, ið hon kann geva, fyri at stuðla undir einari jaligar menning í hinum báðum londunum, eru hon sinnað at veita," staðfesti Mette Frederiksen. 

"Men eg ætli mær ikki at standa og samráðast um ein tunnil her í fólkatinginum."