Volodymyr Zelenskyy er sinnaður at hitta Vladimir Putin hósdagin

Ukrainski forsetin Volodymyr Zelenskyy sigur, at hann er sinnaður at hitta russiska forsetan Vladimir Putin hósdagin.

Tað skrivar Reuters.

Hann sigur samstundis, at hann væntar fulla vápnahvíld fyri at skapa neyðuga grundarlagið fyri diplomati.

- Eg bíði eftir Putin hósdagin í Turkalandi. Persónliga, skrivar Zelenskyy á Telegram.

- Eg vóni, at russarar hesaferð ikki leita eftir eini orsøk til, hví teir ikki kunnu møta, skrivar Zelenskyy.

Friðarsamtalur á Nato-fundi

Leygardagin hittust leiðarar í Evropa saman við Volodymyr Zelenskyy í Ukraina. 

Har heittu teir á Russland um at taka undir við 30 daga vápnahvíld, sum skal byrja í dag.

Putin svaraði við at biða um friðasamtalur við Ukraina í Turkalandi hósdagin, samstundis sum óformellur Nato-fundur er fyri uttanríkisráðharrar.

Trump vil hava Ukraina at tosa við Russland

Amerikanski forsetin Donald Trmp hevur heitt á Ukraina um at tosa við Russland í hesi vikuni.

- Putin forseti í Russlandi vil ikki hava vápnahvíld við Ukraina, men vil heldur hittast hósdagin í Turkalandi, fyri at samráðast um møguligan enda á blóðbaðnum. Ukraina eigur at taka undir við hesum, alt fyri eitt, skrivar Trump á sínum egna miðli Truth Sosial.

Hann skrivar, at Ukraina eigur at fara á fundin, - í hvussu er fyri at kunna avgera, um vápnahvíld yvirhøvur er ein møguleiki.