USA: Putin eigur at taka av uppskoti um vápnahvíld

Russland eigur at góðtaka amerikanska uppskotið um 30 daga vápnahvíld í Ukraina.

Tað sigur umboðið hjá USA í ST-trygdarráðnum, John Kelley.

- Tekur Russland ikki av uppskotinum, sum teimum stendur í boði, fær Russland onga avtalu. Putin, forseti, eigur at taka av, sigur John Kelley sambært Reuters.

Hann sigur, at USA hevur arbeitt miðvíst at fáa í lag eina vápnahvíld, síðani Donald Trump bleiv forseti í januar í ár.

Umhugsa at taka seg úr samráðingunum

- Tekur Russland skeiva avgerð og heldur fram við hesum vanlukkuliga kríggi, fer USA at umhugsa at taka seg úr samráðingunum, upplýsir Kelley eisini.

Í síðstu viku prátaðu Trump og Putin í telefon, samrøðan vardi í meira tveir tímar. 

Men mánadagin vísti amerikanski forsetin sína ónøgd við Putin, eftir umfatandi álopini á Ukraina um vikuskiftið.

Álopið sunnunáttina var, sambært fleiri miðlum, sum endurgóvu ukrainskar myndugleikar, tað størsta higartil í trý ára drúgva krígnum. 

13 fólk lótu lív.

Veit ikki, hvat er hent við Putin

- Eg eri ikki nøgdur við tað, sum Putin ger. Hann drepur nógv fólk, og eg veit ikki, hvat er hent við Putin. Eg havi kent hann leingi. Vit hava altíð verið væl, men nú sendir hann rakettir inn í býir og drepur fólk, og tað dámar mær als ikki. Vit eru mitt í friðartingunum, og hann skjýtur rakettir inn í Kyiv. Tað dámar mær ikki, segði Trump mánadagin.