Nýggi føroyski superbólkurin Tøgn brýtur tøgnina

So kláraðu teir ikki at tiga um Tøgn meira - teir tríggir, Beinir Troest Rasmussen, Jónas Gaard og Bárður Petersen. 

Herfyri kom fyrsta staklagið hjá nýggja føroyska superbólkinum út. 

"Kamarið" eitur sangurin, ið er ein folk/popp-ballada, sum snýr seg um at hava onkran at líta á, tá ið alt tykist svart. 

Hví superbólkur?

Allýsingin av Tøgn sum ein superbólk vísir til, at limirnir í bólkinum eru allir frammanundan kendir sum solistar ella limir í øðrum kendum føroyskum bólkum. 

Beinir hevur luft undir veingjunum og ger um seg á danska tónleikapallinum, og herfyri vann hann tvær FMA-heiðurslønir fyri besta sang og so høvdu føroyingar valt hann til ársins navn. 

Bárður Petersen hevur seinastu árini arbeitt handan tjøldini í fleiri væleydnaðum verkætlanum, millum annað saman við Beini og Jónasi Gaard, ið er triði limurin í nýggja bólkinum, Tøgn.

Jónas Gaard hevur útgivið fleiri føroysk løg, sum hava verið sera væl móttikin.

Hvat er Tøgn?

»Tøgn er ein folk/popp-trio, sum er mannað av trimum vinmonnum - Bárður Petersen, Beinir Troest Rasmussen og Jónas Gaard -, ið allir búgva í Keypmannahavn.«

Hví hava tit stovnað Tøgn?

»Vit hava fyrst og fremst stovnað Tøgn, tí vit eru vinmenn, ið allir elska tónleik. Eisini hava vit tað til felags, at vit elska tað føroyska málið og leingjast heim av og á, og tí vilja geva okkara boð uppá, hvussu føroyskt kann brúkast í popp-samanhangi. Vit leggja okkum eftir at lýsa kenslur og tankar á gerandismáli.«

Hvat er málið við Tøgn?

»Málið hjá okkum er at hava eitt stað, har vit kunnu møtast og savna okkara tankar og kenslur í tónleiki. Sjálvandi er málið eisini, at fólk skulu hoyra tað, sum vit hava uppá hjartað. Tað er ongantíð betur, um fólk kunnu kenna seg aftur í tí, sum vit skriva. Tónleikur fyllir nógv í gerandisdegnum hjá okkum øllum, og tí kendist tað sjálvsagt at gera okkurt saman.«

Hetta verður ikki tað síðsta, ið vit hoyra frá Tøgn, lova teir tríggir. Teir arbeiða støðugt við verkætlanini og hava ætlanir um at skriva og útgeva meira.

Tøgn hava sjálvir framleitt "Kamarið" í MoreMax-studio í Keypmannahavn, meðan Fred Ruddick hevur miksað og masterað.