Rógvi Kárason og Anna Kawalec vunnu Tórshavn Marathon

Tórshavn Marathon er av á hesum sinni.

Klokkan 13 í dag byrjaðu teir umleið 700 rennararnir og gongufólkini, sum høvdu meldað til, og góðan tíma seinni komu fyrstu rennararnir á longu teinunum á mál. Tað var hálvmarathonteinurin, sum fyrst var avgreiddur, og har var tað Neli Heldarskarð, úr Bragdinum, sum vann kappingina í tíðini 1:12:54. Honum á baki komu Oliver Granhøj og Torbjørn Hentze, báðir úr Bragdinum, tann fyrri í tíðini 1:17:17 og tann seinni í tíðini 1:18:44.

Hjá kvinnum var tað Julia Zawadzka úr NBRO í Danmark, sum vann í tíðini 1:29:08. Nummar tvey gjørdist Maria Chun Nielsdóttir úr Bragdinum, sum brúkti 1:40:12 um teinin og svenska Sigrid Landgren gjørdist nummar trý við tíðini 1:41:05.

Marathonkappingina hjá kvinnum vann Anna Kawalec, sum rennur fyri Eskadra Kraków í Pólandi, í tíðini 3:28:15. Nummar tvey gjørdist Carmen Holzmann úr Italia í tíðini 3:36:56 og á triðjaplássi kom Ann Thomsen úr Bragdinum í tíðini 3:39:46.

Hjá monnum var tað Rógvi Kárason úr Bragdinum, sum vann. Hann brúkti 2:45:09 um teinin og tað var góðar seks minuttir frammanfyri nummar tvey, Archie Hunt, úr Stórabretlandi, sum hevði tíðina 2:51:10. Nummar trý gjørdist eisini ein breti, Will Naylor, sum brúkti 3:18:53 um, teinin.

Ina Strømstad úr Noregi og David Wittek úr Kekkia vunnu 10 kilometrakappingina og Felicia Thor úr Svøríki og Bogi Hjalt úr Bragdinum vunnu kappingina í 5,5 kilometrum.

Kappast var eisini í hálvum marathon til gongu. Har vunnu tvey norsk, Birgitte Moen og Einar Haganes,. sum bæði umboða Champange Team. 

Øll úrslitini kunnu annars síggjast við at trýsta á hetta leinkið: https://my.raceresult.com/294902/