Fornfrøðilesandi í Aarhus hjálpa við útgrevstrinum á Sandi

14 fornfrøðilesandi í lærda háskúlanum í Aarhus hjálpa Tjóðsavninum við útgrevstrinum á Sondum á Sandi.

Gróthúsið ytst á bakkanum á Sondum var í stórum vanda fyri at fara í havið.

Tað er tí flutt longri inn í lendið, og verður bygt upp aftur. 

Tummas Pauli Olsen úr Húsavík laðar gróthúsið upp aftur.

Av tí at vandi er fyri, at fleiri fornminni fara í havið, vera tey grivin út nú. Eitt grevstrarøki er latið upp.

Útgrevstur á Sondum, útgrevstur á Sandi

Gróthúsið verður laðað uppaftur. (Mynd Almanna- og mentamálaráðið)

Ferhyrntur bygningur

Beint undir svørðinum er ein ferhyrntur bygningur komin til sjóndar. 

Bygningurin er úr nýggjari tíð, og hevur møguliga verið ein tarakøstur. 

Bygningurin verður skrásettur.

Síðani verður farið longri niður fyri at koma niður á tey fornminni frá miðøld og víkingatíð, sum eru í fláunum longri niðri.

Kanningar, sum fyrr eru gjørdar á Sondum, siga, at har hava verið fólk árini millum 300 og 500 og millum 500 og 700.

Norrøna landnámið var ár 800.

Útgrevstur á Sondum, útgrevstur á Sandi

Frá vinstru: Herleif Hammer, stjóri á Tjóðsavninum, Eirikur í Jákupsstovu, landsstýrismaður í almanna- og mentamálum, Frederikke Reimer, ph.d. lesandi á Aarhus Universiteti, Helgi Michelsen, leiðari á Fornfrøðideildini á Tjóðsavninum og Mads Bakken Thastrup, plantufornfrøðingur á Moesgaard, Aarhus Universitet. (Mynd: Almanna- og mentamálaráðið)