Vildi ikki góðkenna byggisamtyktina fyri Klivaløkshaga

Enn er byggisamtyktin fyri Klivaløkshaga ikki broytt.

Náttúrufriðingarnevndin í Sandoyar sýslu gav fyrst í oktober í fjør loyvi til vindmyllurnar og vegin.

Umhvørvisstovan gav í februar felagi, sum Jóhan í Niðristovu og onnur ætla at stovna, loyvi at byggja myllurnar vestanfyri Sands bygd. 

Tað er, at felagið fær loyvi til elframleiðslu úr vindorku.

Men enn er byggisamtyktin fyri økið við Klivaløkshaga ikki broytt. 

Søktu um góðkenning í apríl

Í apríl søkti Sands Kommuna Umhvørvismálaráðið um góðkenning av broyttu byggisamtyktini fyri matriklarnar: 397c, 388a, 389b, 390, 391, 392 og 399 frá landbúnaði til vinnuøki. Haraftrat serstaka byggisamtykt fyri sólorkulund í Reynatúgvuhaga og serstaka byggisamtykt fyri vindmyllur í fleiri hagapørtum.

Men kommunan fekk avslag í svari dagfest tann 16. apríl. Byggisamtyktin fyri økið er tí ikki broytt til hvørki vindmyllulund ella sólorkulund.

Orsøkin er, at umsóknin er heft við feilum, stendur í svarinum frá Umhvørvismálaráðnum.

Eitt nú verður nevnt, at Sands bygdaráð hevur givið principielt byggiloyvi til vindmyllulund, sum ikki er galdandi. Haraftrat verður viðmerkt, at skjøl mangla, og at tað er ógreitt, hvat tað er sum kommunan hevur tikið støðu til í fleiri ymiskum førum, tí tað ikki er nevnt ella tilmælir, sum verða nevnd ikki er løgd við.

At kommunan fekk avslag merkir, at tey mugu senda nýggja umsókn, og hetta kann seinka gongdini í málinum munandi.

Ætlanin er at seta sjey vindmyllur upp vestanfyri Sands bygd. Eisini er ætlanin at gera veg úr landsvegnum millum Sand og Skopun í Klivaløkshaga.

Loyvini, sum higartil eru givin, eru treytað av, at onnur neyðug loyvi eisini kunnu fáast til vegar. Teirra millum eru loyvi frá Yvirfriðingarnevndini, loyvi frá Sands kommunu, og endalig avtala skal gerast við jarðareigararnar í økinum.