Poul verður nummar 10 í Hillerød

Hillerød hevur gjørt eina avtalu við Víking um keypið av Poul Kallsberg. 22 ára gamli áleyparin skiftir til Hillerød, tá Víkingur hevur spælt sínar Champions League dystir í summar. Partarnir hava gjørt sáttmála fram til 2028. Hillerød spælir í næstbestu deildini í Danmark. Prísurin verður mettur at liggja um eina hálva milión krónur.

- Poul Kallsberg er kanska størsta álopstalentið í Føroyum. Hann var ein lyklaspælari, tá Víkingur vann meistaraheitið í fjør. Hann var íblandaður í 22 málum í 22 dystum. Hann hevur teknikk, gott eyga fyri spælinum, málstig og hart arbeiði, eru alt dygdir vit í Hillerød raðfesta, sigur Jackie Rasmussen  við heimasíðuna hjá felagnum.

Í Víkingi er tað við sorgblídni og stoltleika, at felagið enn eina ferð selur ein spælara. Fyrst fóru Noah Mneney og Gunnar Vatnhamar, og undan hesum kappingarárinum var tað Géza Dávid Turi, ið bleiv seldur.

- Víkingur ynskir ikki at standa í vegin, tá ið leikarar ynskja at royna seg uttanlands, men tað er eingin loyna, at tað verður ein stórur missur, nú Poul fer, skrivar Víkingur.

Poul Kallsberg og Víkingur skulu í fyrstu atløgu royna at venda einum 3-2 tapi móti Lincoln Red Imps F.C í 1. undanumfarinum í Champions League.