Føroysk finala í blandaðum tvímansleiki

Tað verður rein føroysk badmintonfinala í blandaðum tvímansleiki í Kirkwall í morgin.

Rúni Øster og Miriam í Grótinum skulu nevniliga dystast ímóti Magnusi Dal-Christiansen og Sannu Thorkildshøj í badmintonhøllini á Picky-leikvøllinum, og sostatt eru bæði gull og silvur tryggjað Føroyum.

Føroyameistaraparið vann sannførandi 2-0 sigrar í øllum fýra dystunum fram ímóti finaluni, meðan Magnus Dal-Christiansen og Sanna Thorkildshøj máttu kempa seg framvið einum grønlendskum pari í hálvfinaluni.

Úrslitið í dag merkir, at Føroyar eru í øllum fimm finalunum, sum vera í morgin.

Í einmansleiki við monnum skal Rúni Øster royna seg ímóti Toke Driefter úr Grønlandi, í einmansleiki við kvinnum skal Miriam í Grótinum spæla ímóti Saru Jacobsen úr  Grønlandi. Rúni Øster og Magnus Dal-Christiansen skulu spæla í tvímansleiki ímóti Alex Tapp og David Trebert úr Guernsey, meðan Miriam í Grótinum og Bjarnhild í Buð Justinussen bresta saman við Kimberley Clague og Jessica Li úr Isle of Man.