Ukraina fær týska og norska hjálp til loftverjuskipan

Týskland og Noreg fara saman at geva "eitt týðandi íkast", so at Ukraina kann taka ímóti amerikansku Patriot-loftverjuskipanini.

Tað sigur týski samveldiskanslarin, Friedrich Merz, í Berlin, har norski forsætisráðharrin, Jonas Gahr Støre, hevur verið á vitjan

- Ukraina hevur brúk fyri okkara stuðli, og Gudi havi lov, at USA er til reiðar at lata vápn til Ukraina, eisini fíggjað av evropeiskum samstarvsfeløgum. Týskland og Noreg fara at geva eitt týðandi íkast, sigur Merz, sambært norska miðlinum NRK.

Patriot-skipanin er ein av heimsins mest framkomnu rakettverjuskipanum, og fer at geva Ukraina betri møguleikar at verja sítt loftrúm.