Ukrainar vilja hava Zelenskyj at brúka sýtingarrættin

Túsundtals fólk vóru í gjár komin saman í Kyiv og øðrum býum í Ukraina við áheitan á Volodomyr Zelenskyj, forseta, um at brúka sýtingarrættin móti einum umstríddum lógaruppskoti.

Tað skrivar AP-tíðindastovan.

Lógaruppskotið, sum ukrainska tingið hevur samtykt, hevur við sær hert eftirlit við tveimum anti-korruptiónsmyndugleikunum í Ukraina.
 
Við lógaruppskotinum fær stjórnin størri vald, tá kanningar verða gjørdar, siga tey, sum finnast at uppskotinum.

Mótmæl í Ukraina

Mynd: AFP/Ritzau Scanpix)

- Lógin kemur samstundis sum tað framvegis eru trupulleikar við mutri í Ukraina, sigur Emil Filtenborg, tíðindamaður hjá Jyllands-Postinum í Ukraina við danska kringvarpið.

- Lógin kann hava møguligar vanlukkuligar avleiðingar við sær fyri áskoðanina hjá vesturheiminum á Ukraina. 

Myndugleikarnir báðir eru sera umráðandi stovnar í stíðnum ímóti mutri í Ukraina, sigur hann.

Hetta er fyrstu ferð síðani Russland gjørdi innrás í Ukraina tann 24. februar 2022, at ukrainska fólkið hevur skipað fyri mótmælum móti sitandi stjórn.

- Lógin oyðileggur álit og kann oyðileggja viljan hjá ukrainum at seta lívið í váða í stríðnum ímóti Russlandi, sigur tíðindamaðurin hjá Jyllands-Postinum við danska kringvarpið.