Landskassin sleppur helst undan at rinda ferðsluveðhald í ár

Ferðslan í Eysturoyar- og Sandoyartunlum er vaksin so nógv, at stjórin í felagnum væntar, at veðhaldið, sum landskassin læt felagnum í sambandi við fíggingina av tunlunum báðum, verður ikki effektivt.

Tað merkir, at landskassin sleppur undan at gjalda felagnum pengar.

Suðuroyartunnil og semjuskjal, Teitur Samuelsen

Teitur Samuelsen er stjóri í tunnilsfelagnum. 

Fyrstu seks mánaðirnar í ár var ferðslan í Eysturoyartunlinum umleið eina millión og 150.000 akfør, og í Sandoyartunlinum  koyrdu 186.000 akfør.

Tað gevur eina miðalferðslu uppá 6.360 bilar í Eysturoyartunlinum og góðar 1.000 bilar í Sandoyartunlinum um samdøgrið.

Hoyr samrøðu við Teit Samuelsen, stjóra í tunnilsfelagnum, í útvarpstíðindunum: 

Veðhaldið hjá landskassanum heldur fram, til lánið er afturgoldið við árslok í 2040.

Fyrstu árini rindaði landskassin 141 milliónir krónur í veðhaldi. Í ár eru 12 milliónir settar av, sum eru fyri seinna hálvár í fjør.

Tað er ikki bara í Eystur- og Sandoyartunlum, at ferðslan er vaksin í ár, men eisini í Vágatunlinum og Norðyatunlinum.