Amerikanskur sendimaður í Gasa - skundar undir friðarsamráðingar

Serligi amerikanski sendimaðurin, Steve Witkoff, kom til Ísraels í gjár, og vitjar í dag Rafah í Gasa-geiranum at hava umsjón við útbýtingini av mati til neyðstødd, sum amerikanski/ísraelski felagsskapurin GHF - Gaza Humanitarian Foundation - stendur fyri. 

Funnist hevur verið at felagsskapinum fyri vandamiklu umstøðurnar, fólk koma í, tá tey savnast at bíða eftir neyðsynjarmatvørunum frá felagsskapinum. Fleiri enn 90 fólk eru dripin seinasta samdøgrið, tá tey royndu at fáa matvøruhjálp, siga heilsumyndugleikarnir í Gasa, ið virka undir Hamas-stýrinum. 

Fáa enda á hungursneyðini

Annað endamálið við vitjanini hjá serliga amerikanska sendimanninum er at fáa enda á humaniteru kreppuni og hungursneyðini, sum altjóða hungurseftirlitið IPC sigur seg kunna staðfesta í Gasa. Hitt endamálið er at fáa glið aftur á samráðingarnar um vápnahvíld og leyslating av ísraelsku gíslunum hjá Hamas.

Hetta skrivar Reuters. 

Samstundis sum Steve Witkoff vitjar í Gasa, skrivar amerikanski forsetin á sosiala miðli sínum, at skjótasti mátin at enda humaniteru kreppuna í Gasa er, at Hamas yvirgevur seg og letur gíslarnar leysar.

Steve Witkoff hitti Benjamin Netanyahu, forsætisráðharra, í gjár. Á fundinum umrøddu teir uppsteðgaðu samráðingarnar um vápnahvíld í krígnum í Gasa.

Broyta samráðingarkós

Ein talsmaður fyri ísraelsku stjórnina segði eftir fundin við Jerusalem Post, at bæði londini, Ísrael og USA, eru samd um, at neyðugt er at broyta samráðingarkós, tí Hamas ikki vil slaka fyri at fáa semju í lag.

Sambært Reuters segði ein ísraelskur embætismaður, at farið verður frá eini ætlan um at fáa nakrar av gíslunum leyslatnar, til eina ætlan um at fáa allar gíslarnar leyslatnar, at avvápna Hamas og allan Gasa-geiran.