Viðbótin hjá fyrrverandi leiðara á Heilbrigdi í landsrættin

Eystari landsrættur skal meta, um avgerðin hjá Føroya rætti um viðbótina hjá Sjúrði Knudsen, sum var leiðari á Heilbrigdi, er røtt.

Føroya rættur segði í apríl í fjør, at Heilbrigdi skal gjalda 330.800 kr. umframt rentu í viðbót.

Heilbrigdi var eisini dømt at rinda sakarkostnaðin hjá Sjúrði Knudsen. Hann er 53.000 kr.

Heilbrigdi appelleraði dómin. Og Eystari landsrættur skal viðgera hann fríggjadagin í næstu viku.

Fráfaringaravtala

Sjúrður Knudsen fór frá sum leiðari á Heilbrigdi 1. februar í 2023 Tá var fráfaringaravtala gjørd millum hann og Heilbrigdi.

Hann segði seg hava gjørt avtalu um viðbót, tá hann var settur.

Men Heilsumálaráðið og Heilbrigdi vildu ikki góðtaka viðbótina, sum tí ongantíð var goldin.

Sjúrður Knudsen stevndi tí Heilbrigdi, og fekk viðhald í Føroya rætti.

Sjúrður Knudsen var leiðari á Heilbrigdi frá 1. mai 2018.