Fundurin í Hvítu Húsunum er byrjaður

Teir hittast eftir at Trump fríggjadagin var á fundi við russiska forsetan, Vladimir Putin, sum endaði uttan nakra ítøkiliga niðurstøðu.

Seinast Trump og Zelenskyj hittust, var í februar. Tá endaði fundurin við einari ósemju millum Zelenskyj og amerikanska forsetan, Donald Trump og varaforsetan, J.D. Vance.

Hesuferð er Zelenskyj øðrvísi fyrireikaður, tí hann kemur ikki á fund einsamallur. Við sær hevur hann eina røð av evropeiskum leiðarum;
Tey eru franski forsetin, Emmanuel Macron, bretski forsætisráðharrin, Keir Starmer, týski kanslarin Friedrich Merz, italska forsætisráðfrúan Giorgia Meloni, finski forsetin, Alexander Stubb, forkvinnan í ES-nevndini, Ursula von der Leyen, og aðalskrivarin í NATO, Mark Rutte.

Og við sær hevur Donald Trump amerikanska varaforsetin J.D. Vance, amerikanska uttanríkisráðharran Marco Rubio, starvsfólkaleiðaran í Hvítu Húsunum, Susie Wiles og sendiharrarnar Steve Witkoff og Keith Kellogg.

Fleiri evropeiskir stjórnarleiðarar fundaðust talgilt í gjár, áðrenn fundin sum nú er byrjaður. Tey hava arbeitt við einari felags visjón fyri eini friðaravtalu millum Ukraina og Russland, sum kann verða løgd fram fyri Donald Trump í kvøld.

Undan fundinum hevur amerikanski forsetin sett út í kortið fyri fundin í dag.

Á sínum egna sosiala miðli, Truth Social, skrivar Trump, at Ukraina ikki fær Krim-hálvoynna aftur, og Ukraina má gloyma at sleppa upp í NATO.

Per Bang Thomsen, Evropa analytikari hjá danska kringvarpinum, væntar, at evropeisku stjórnarleiðarnir fara at leggja dent á, at hetta ikki bara snýr seg um Ukraina, men trygdina í øllum Evropa. Boðskapurin til Trump verður tí, at tey ynskja frið, men tað skal vera ein varandi friður.
 

Kelda: dr.dk og tv2.dk