Zelensky tosað við Witkoff og Kushner um friðarsamráðingar

Forsetin í Ukraina, Volodymyr Zelensky, sigur, at hann hevur tosað við serligu amerikonsku sendimenninar, Steve Witkoff og Jared Kushner.

- Ein sera positiv samrøða, skrivar Zelensky í einum uppslagi á boðtænastuni Telegram.

Forsetin rósti viljanum hjá Witkoff og Kushner at halda fram at arbeiða næstu vikurnar fyri at fáa diplomatiskan enda á krígnum millum Russland og Ukraina.

Zelensky skrivar eisini, at hann hevur tosað við franska forsetan, Emmanuel Macron, og at teir umrøddu samrøðuna hjá Zelensky við amerikonsku sendifólkini, umframt at hann hevur samskipað framtíðar stig, sum skulu takast.

Zelensky skrivaði hetta í gjár á veg heim úr London, har hann sunnudagin hitti franska forsetan, Emmanuel Macron, bretska forsætisráðharran, Keir Starmer, og týska samveldiskanslaran, Friedrich Merz.

Zelenskyj

Iran-kríggið skúgvað semingsroyndir til viks

Amerikonsku royndirnar at royna semju millum Russland og Ukraina eru skúgvaðar til viks av Iran-krígnum. 

Zelensky sigur, at hann og tey bæði amerikonsku sendifólkini umrøddu møguleikan fyri fundi í sambandi við komandi G7-toppfundi í Evian í Fraklandi.

Ein kelda sigur við Reuters, at amerikonsk og ukrainsk embætisfólk tosa um møguleikan fyri, at Witkoff og Kushner koma á vitjan í Kiev. 

Tað hevði so verið fyrsta almenna vitjanin hjá sendifólkunum í Ukraina. 

Frammanundan hava Witkoff og Kushner bara verið í Moskva og tosað við russiskar leiðarar.