Tjørnin í Gundadali komin aftur

-  Hetta var eitt paradís, og í dag er næstan ein uppreistrardagur, eitt undur, nú vatn aftur er í tjørnini.

- Her eru nógv góð minni. Vit spældu eftir árstíðunum. Um veturin skoytaðu vit, og um summarið sigldu vit á flakum og bátum. 

Teir báðir Árni Helmsdal og Høgni Jensen eru ovurfegnir, nú gamla tjørnin í Gundadali er komin aftur. Tjørnin lá í haganum hjá Húsagarði, eisini kallað Mexico, nærhendis plantasjuna og plenuna í Gundadali. 

Beint við var Buglu- Jensen, og hann kundi onkuntíð skera tunnur upp, sum kundu brúkast til flaka. Onnur bygdu sær flaka við timbri, sum var hildið uppi við eyðkendu tundurkassunum, ið fólk høvdu frá Katrup, tá ið tey høvdu "bestilt" brennivín. Um vetrarnar var fult av børnum, tá ið tjørnin frysti, og yvirhøvur hava fleiri ættarlið av børnum góð minni frá tjørnini. 

Í fjør gav Tórshavnar býráð umhvørvisstuðul til verkætlanir við vatni sum evni, og tá komu Árni Helmsdal  og Høgni Jensen við uppskotinum at fáa vatn aftur í tjørnina í Gundadali, sum hevur ligið undir heilum síðan miðskeiðis í 80-árunum. 

Hoyr samrøðuna við Árna Helmsdal og Høgna Jensen um afturkomnu tjørnina í Gundadali.