Ranja og Sirkill tvísporaðu seg til føroyameistaraheitið

Ranja H. Djurhuus og hesturin Sirkill livdu upp til vónirnar, tá tey vóru skjótast í Vágum í seinastu kappingini í tvíspori í summar.

Tey vóru í góðari støði eftir sigurin fyri tveimum vikum síðan, og tryggjaðu sær eisini føroyameistaraheitið við nýggjum sannførandi sigri leygardagin, skrivar Ríðisamband Føroya.

Vinnaratíðin var 17.92 sekund. Barbara Carlsen, sum reið á Svannu, varð nummar tvey við 18.43, og á 3. plássi endaði Ása Bárðardóttir á Silfá. Føroyameistararnir fingu 28 stig tilsamans, og seks stig vóru niður til 2. plássið.

Ranja H. Djurhuus er bert 17 ára gomul, og hetta er fyrsta árið, hon kappast í fyrsta flokki í tvíspori. Harumframt er hetta fyrsta ferðin, at eitt ross, sum hoyrir heima í Nólsoy, vinnur eitt FM-heiti. Óli Svein Lutherusson eigur Sirkill.

Tvíspor ung vann Sólrun Lútzen á Thor úr Syðradali. Tey vunnu eisini FM við 33 stigum. Simona Tornby og Gígur yvirhálaðu Lív Djurhuus á Dropa við teprum sigri í trav um vikuskiftið og fóru tískil avstað við FM við 25 stigum ímóti 24.

Í skeið vann Stígur og Randarsól Heinensen á Brúna hjá Jóannesi Debes, og í tøltinum var tað Brynjar og Regin Johannesen sum vunnu á Tango hjá Silju G. Eystberg. FM-raðfylgjan var hin sama.