Stjórin: Framtíðin hjá Tjóðpallinum er bjørt

Framtíðin hjá Tjóðpallinum er bjørt og ætlanirnar og møguleikarnir eru nógvir. Tað sigur Harald Thompson Rosenstrøm, stjóri á Tjóðpalli Føroya, sum hevur góðar vónir til komandi leikárið og framtíðina hjá Tjóðpallinum, hóast at hann heldur, at leiklistaumhvørvið hevur brúk fyri betri umstøðum at virka í. 

Fríggjadagin var sesongbyrjan hjá Tjóðpallinum, har stjórin legði fram, hvussu leikárið og framtíðin hjá Tjóðpalli Føroya, fer at síggja út. 

Visión og kjarnuvirði

Harald Thompson Rosenstrøm greiddi frá visiónini og kjarnurvirðunum hjá Tjóðpallinum. Visión teirra er "Tjóðpallur Føroya - eitt livandi leikhús, ið bjóðar viðkomandi pallist á høgum altjóða støði".

Kjarnuvirðini eru opinleiki, dygd, virðing, menning og dirvi. Hesum greiðir stjórin nærri frá í longri samrøðuni niðanfyri.

Nøkur av høvuðsmálinum hjá stovninum, sigur stjórin, er at fáa meira føroyskt framleiddan dramatikk. "Tað hava vit ikki nóg mikið av. Nóg mikið av pengum eru heldur ikki til tess, so tað vóna vit at fáa til vega." 

Stjórin ætlar at skipa eitt tilboð til ung, fyri at stimbra og kveikja áhugan fyri leiklist hjá ungum. 

Hann ætlar eisini, at leikir skulu framførast aðrastaðni enn á Tjóðpallinum, á øðrum mentarpallum í landinum. "Vit hava so nógvar góðar pallar, so vit skulu út um býin og vera ein Tjóðpallur fyri alt landið", sigur Harald Thompson Rosenstrøm.

Hoyr innslag úr tíðindunum niðanfyri:

Hoyr longri samrøðu við stjóran á Tjóðpalli Føroya, Harald Thompson Rosenstrøm, um leikárið og framtíðina hjá Tjóðpalli Føroya: