Eingin ætlan um trípartafund

Ongar ítøkiligar ætlanir eru um trípartafund millum forsetarnar í Ukraina, Russlandi og USA, upplýsir ein talsmaður fyri Kreml.

- Nú tosa øll um trípartafund millum Putin og Zelenskyj, men eingin ítøkilig avtala hevur verið um hetta millum Putin og Trump, segði talsmaðurin og ráðgevin hjá Kreml, Juri Ushakov, við russiskt sjónvarp í gjár.

Eftir at amerikanski forsetin, Donald Trump, í summar var vertur fyri russiska forsetan, Vladimir Putin, í Alaska, varð nógv tosað um ein komandi fund millum forsetarnar. 

Skal fyrireikast væl

Ítøkiligari upplýsingar eru tó ikki komnar um slíkan fund.

Kreml hevur framvegis ikki útihýst møguleikan fyri fundi millum tey trý londini, ella beinleiðis við ukrainska forsetan, Volodymyr Zelenskyj, men hevur sagt, at slíkur fundur skal vera sera væl fyrireikaður.

Ukrainskir o​g evropiskir politikarar hava funnist at Russlandi fyri at seinka tilgongdini at fara undir veruligar friðarsamráðingar millum londini.