Stórtingsval í dag - 18 flokkar kappast um 169 sessir

Stórtingsval er í Noregi í dag.

Tey fleiri enn 1600 valhølini lótu upp í morgun, men áðrenn valhølini lótu upp, høvdu umleið 1,9 milliónir fólk longu greitt atkvøðu. Og tað er tað mesta nakrantíð, sambært NRK.

Gamla metið var á stórtingsvalinum fyri fýra árum síðani, tá umleið 1,6 milliónir fólk atkvøddu fyri sjálvan valdagin.

Valskipanin í Noregi er soleiðis, at fólk hava kunnað greitt atkvøðu frá 11. august til 5. september, sum var fríggjadagin. Hini kunnu so velja í dag. 

Veljast skulu 169 fólk í stórtingið.

18 flokkar stilla upp til stórtingsvalið hesa ferð, av teimum fingu níggju umboðan í stórtingið á valinum fyri fýra árum síðani.

Erna Solberg

Erna Solberg, forkvinna í Høgraflokkinum, á vali. (Mynd: NTB/Ritzau Scanpix)

Sylvi Listhaug

Sylvi Listhaug er forkvinna í Framburðsflokkinum. (Mynd: NTB/Ritzau Scanpix)

Stjórnin vinnur

Sambært nýggjastu veljarakanningini hjá norska TV2 verður tað stjórnin hjá hjá Jonas Gahr Støre, sitandi forsætisráðharra, sum vinnur valið í dag. 

Flokkurin fær útvið 30 prosent av atkvøðunum, og kann skipa stjórn saman við hinum flokkunum á vinstravonginum. 

Formaðurin í Arbeiðaraflokkinum er sambært TV2 eisini tann, ið flestu norðmenn vilja hava sum forsætisráðharra næstu fýra árini. 

Helvtin av teimum spurdu í kanningini hjá TV2 vilja hava Jonas Gahr Støre til forsætisráðharra. 

Góð 24 prosent av teimum spurdu vilja hava Ernu Solberg, forkvinnu í Høgraflokkinum, til forsætisráðharra. 

Og góð 20 prosent vilja hava Sylvi Listhaug, forkvinnu í Framburðsflokkinum, til forsætisráðharra.