Russland: Danska hóttanarmetingin er politisk

Hóttanarmetingin, sum danska verjufregnartænastan, FE, er komin við í dag, er politisk og ikki gjørd við støði í objektivum kanningum.

Tað skrivar russiska sendistovan í Danmark í viðmerking, sum danska kringvarpið endurgevur frá Ritzau-tíðindastovuni.

- Endamálið er at rættvísgera tær skilaleysu viðmerkingarnar frá donskum politikkarum um at fyrireika seg til eitt beinleiðis hernaðarligt stríð við Russland, teirra tørv á at órógva eina avtalu um stríðið í Ukraina og ákærur um, at land okkara fremur hybrid-kríggj, skrivar russiska sendistovan sambært Ritzau.

Thomas Ahrenkiel

Thomas Ahrenkiel er stjóri í fregnartænastuni hjá donsku verjuni. (Mynd: Ritzau Scanpix)

Einki hald í uppáhaldinum

Danska verjufregnartænastan staðfesti fyrr í dag, at Russland í løtuni førir hybrid-kríggj móti Danmark og vesturheiminum.

- Slík uppáhald, sum einki hald er í, elva bert til anti-russiskt ovursinni, og økja spenningin á evropeiska meginlandinum, skrivar sendistovan.

 - Russland hevur ongantíð havt stríðshugaðar ætlanir móti Danmark, og hevur tað heldur ikki í dag, stendur í boðunum frá russisku sendistovuni í Danmark.

Danska verjufregnartænastan sendi í morgun út nýggja meting um hybridhóttanina móti Danmark. Tað gjørdi hon á tíðindafundi í morgun.

Hybrid-hóttanin veksur

Fregnartænastan metir, at Russland í løtuni førir hybrid-kríggj móti NATO og vesturheiminum, og stór sannlíkindi eru fyri, at hybrid-hóttanin frá Russlandi móti Nato veksur næstu árini.

FE skrivar á heimasíðu síni, at tað er sera sannlíkt, at Russland heldur seg vera í stríði við vesturheimin, har amboðini verða hildin undir vápnaðum stríðsstigi. 

- Danski herurin hevur seinastu tíðina upplivað fleiri beinleiðis hóttanir frá russiska hervaldinum, segði Thomas Ahrenkiel, stjóri í fregnartænastuni hjá donsku verjuni, við danska kringvarpið í morgun.