Hægstirættur gevur Føroya rætti viðhald í barnaverndarmáli

Hægstirættur hevur tikið eina týðandi avgerð í einum føroyskum barnaverndarmáli, har Føroya Kærustovnur hevði avgjørt at flyta ein tá 15 ára gamlan drong úr einum stovni í Føroyum til ein stovn í Danmark – hóast drongurin ikki tosaði danskt.

Foreldrini hjá dronginum kærdu avgerðina og bóðu um, at flytingin varð steðgað, meðan málið varð viðgjørt. Føroya rættur gav teimum rætt í hesum og steðgaði avgerðini, men Landsrætturin ógildaði tað, við teirri grundgeving, at føroyska barnaverndarlógin ikki loyvir, at kærur fáa steðgandi virknað .

Hægstirættur: Undantøk eru møgulig
Hægstirættur metir nú málið øðrvísi. Rætturin sigur, at hóast barnalógin í grundini sigur, at kærur ikki hava steðgandi virknað, so kann Føroya rættur gera undantak í serligum førum.

Hetta merkir, at dómarar í Føroyum kunnu velja at útseta eina avgerð, um vandi er fyri álvarsligum sálarligum ella sosialum skaða orsakað av tvingsilsflyting.

Rættartrygdin styrkt
Í málinum varð dentur lagdur á, at drongurin longu var fluttur fleiri ferðir, at hann nú trivist væl á stovninum í Føroyum, og at tað ikki var bráðneyðugt at flyta hann.

Víst varð eisini á, at drongurin dugdi ikki danskt, og at ein flyting tí kundi fáa álvarsligar sálarligar avleiðingar.

Hægstirættur sigur, at dómstólarnir hava skyldu at taka slík viðurskifti til eftirtektar – serliga tá talan er um børn.

Avgerðin merkir, at rættartrygdin hjá børnum og foreldrum verður styrkt, og at Føroya Kærustovnur má taka hædd fyri møguligum sálarligum skaðum, áðrenn børn verða flutt, og avgerðin kann eisini fáa týdning fyri, hvussu føroyska barnaverndarskipanin verður tulkað og umsitin framyvir.

Málið skal viðgerast av nýggjum
Hægstirættur hevur tí ógildað avgerðina hjá Landsrættinum, og hevur heitt á rættin um at taka málið upp aftur til nýggja viðgerð.

Tað merkir, at flytingin av dronginum er fyribils steðgað, meðan málið verður endaliga viðgjørt í rættarskipanini.

Avgerðin hjá Hægstarætti kann lesast HER.

Trýst á leinkið niðanfyri og hoyr alt innslagið, sum var í tíðindunum klokkan 18.