Setti fýra aðalstjórar í fjør - nú verða tríggir koyrdir úr starvi

Síðsta hálvtannað árið hevur løgmaður sett fýra aðalstjórar í starv.

Nú kúvendir Aksel V. Johannesen og koyrir tríggjar aðalstjórar úr sínum starvi.

Soleiðis sá lýsingin eftir aðalstjórunum út á heimasíðuni hjá Løgmansskrivstovuni í apríl í fjør, tá søkt var eftir aðalstjórum til Løgmálaráðið, Umhvørvismálaráðið og Fiski- og samferðslumálaráðið:

 

 

 

11.juni vóru Nella Festirstein, Pól Egholm og Elin Mortensen sett í størvini.

Júst tey trý høvdu tá verið fyribils settir aðalstjórar í nevndu ráðum í hálvt annað ár.

 

Áramálssett í sjey ár

Tey trý vórðu ikki sett sum tænastumenn, men áramálssett í sjey ár.

Afturfyri fingu tey ikki minni enn tvær viðbøtur - tey fingu vanligu aðalstjóraviðbótina á 6.400 krónur um mánaðin, og so fingu tey 20 prosent oman á vanligu aðalstjóralønina fyri fyri áramálssetanina.

Tey fáa tí góðar 92.000 krónur um mánaðin, umframt 15 prosent í eftirløn.

Tey trý eru ikki einastu aðalstjórar, ið løgmaður hevur sett síðsta hálvt annað árið.

 

Bjørgfríð Ludvig. (Mynd: Bjarni Árting Rubeksen)

 

Í september í fjør varð lýst eftir aðalstjóra til Heilsumálaráðið. Tað var eftir at Turið Arge varð koyrd úr starvinum og nýtt fólk skuldi finnast fyri hana.

Turið Arge er í dag "fíggjarráðgevi" í Løgmálaráðnum. Í oktober í fjør varð Bjørgfríð Ludvig sett sum aðalstjóri í Heilsumálaráðnum. Eisini hon er áramálssett, við somu treytum sum hini trý.

 

Tríggir sparast burtur

Men nú nýskipanarnevndin hevur talað - smáar 17 mánaðir eftir at tríggir aðalstjórar vórðu settir í starv, og eitt ár eftir at hin fjórði varð settur - skulu tríggir aðalstjórar sparast burtur.

Valið fall á Poul Geert Hansen, sum er aðalsstjóri í Barna- og Útbúgvingarmálaráðnum; á Eyðun Mohr Hansen, sum er aðalstjóri í Almanna- og Mentamálaráðnum; og á Nellu Festirstein, sum er aðalstjóri í Løgmálaráðnum.

 

Poul Geert Hansen. (Mynd: Bjarni Árting Rubeksen)

 

Poul Geert Hansen og Eyðun Mohr Hansen eru báðir tænastumenn. Tað merkir, at teir kunnu fara til hús við fullari løn í trý ár, um teimum ikki verður bjóðað eitt líknandi starv í Tinganesi, sum teir taka av. Her er eingin avtala gjørd enn.

Nella Festirstein er sett eftir stjórasáttmála, og sum útvarpið skilir, heldur hon fram í starvi í Tinganesi, hóast hon ikki verður aðalstjóri meira.

Løgmaður er setanarmyndugleiki hjá aðalstjórunum. Tað hevur ikki eydnast at fáa viðmerking frá Akseli V. Johannesen.

Hoyr innslag í útvarpstíðindunum: