Pantskipanin skal vera lættari at umsita

Lógin um pantskipan skal broytast, so skipanin verður lættari at umsita.

Tað ætlar Umhvørvismálaráðið, sum hevur gjørt uppskot um broyting, sum skal koma í gildi næsta vár samstundis sum øll lógin um pantskipan kemur.

IRF hevur í arbeiðinum at menna innkrevjingarskipanina til pantskipanina staðfest, at tær upplýsingar, sum TAKS kann veita í sambandi við innflutning, ikki eru nóg neyvar til at kunna staðfesta pant og rakstrargjald.

IRF skal eisini fáa heimild at krevja pant og rakstrargjald í teimum førum, har innflytari ella framleiðari ikki veitir neyðugt skjalprógv rættstundis.

Uppskotið gevur heimild at nýta størra vekttalið ella litratalið í tollrokningini sum grundarlag fyri uppkrevjing, tá neyðug skjalprógv ikki eru.

Hetta skal eggja innflytarum og framleiðarum til at veita skjalprógv rættstundis fyri at sleppa undan ov stórum gjaldi, sigur Umhvørvismálaráðið.