Borgarstjórin í Vágum: Ferðslan í Miðvági og Sandavági er longu ótolandi

Sjálvt um Bjarni Prior, borgarstjóri í Vága kommunu, fegnast um, at farast kann undir útbyggingina av flogvøllinum, so rópar hann nú varskó.

- Tað gevur onga meining, at samstundis sum landið játtar 350 milliónir krónur til útbygging av Vága Floghavn, verður null sett av til ferðslutrygd ella innkomuveg til einastu farleiðina til flogvøllin, sigur hann í skrivi, sum kann lesast í fullari longd á heimasíðuni hjá Vága kommunu.

Ferðslan í Sandavági og Miðvági er longu ótolandi sum er, og við útbyggingini av flogvøllinum kann roknast við, at ferðslan fer at økjast nógv, og tað tola bygdirnar ikki.

Tí má og skal landsmyndugleikin taka sína uppgávu í álvara og hjálpa til við at finna eina loysn á avbjóðingini, fyrst eina stutttíðarloysn - og so eina langtíðarloysn, sigur borgarstjórin.

Bjarni Prior, Vága kommuna