Veiðigjaldslógin skal leggja upp fyri støðuni hjá reiðaríum

Tingfólk í samgongu og andstøðu siga, at eftir verandi skipan verða øll vigað á somu vágskál, og tey, sum fiska lítið, rinda lutvíst meira enn tey, sum fiska nógv

Katrin Jóhanna er eitt av uppsjóvarskipunum. Tingfólk í samgongu og andstøðu mæla nú til at broyta veiðigjaldslógina, so munur verður gjørdur á rættindahavarum, sum hava stóra og lítla kvotu.

Høgni Djurhuus

19.12.2025 - 08:51

Tingfólk í samgonguni og í andstøðuni hava biðið landsstýrið broyta veiðigjaldslógina.

Tey vilja hava lógina broytta, so hon leggur upp fyri støðuni og kvotanøgdini hjá rættindahavarunum.

Tey siga, at góðska og prísur fylgjast sum oftast.

Verandi skipan ger, at øll vera vigað á somu vágskál, sum er miðalprísurin.

Tann, sum hevur 5.000 tons, kann ikki gagnnýta sítt skip eins skynsamt sum tann, sum hevur 50.000 tons.

Stutt sagt, tað kostar meira at fiska eitt kilo hjá teimum smáu enn hjá teimum stóru.

Tá avreiðingarprísur heldur enn avlop verður brúktur sum vágskál, rinda tey, sum fiska lítið, lutvíst meira enn tey, sum fiska nógv, siga tey fimm tingfólkini Erhard Joensen, Uni Holm Johannesen, Jacob Vestergaard, Annika Olsen og Bjarni Kárason Petersen.

Les uppskotið her.