Leikarar eru væl fyrireikaðir til EM

Endaspælið í EM í hondbólti fyri menn byrjar í hesari vikuni.

Mikudagin fer føroyska ferðalagið til Oslo, har dystirnir skulu spælast.

Leikararnir eru í allar mátar væl fyri og fyrireikaðir upp á tað, sum stendur fyri framman.

Tað staðfestu Helgi Hoydal, Tróndur Mikkelsen og Pauli Jacobsen, tá teir vitjaðu morgunsendingina, Góðan morgun Føroyar.

Tað, at teir í 2024 vóru við í endaspæli í Berlin, er ein stórur fyrimunur.

- Vit fingu rættiliga nógvar royndir í Berlin, tá vit vóru til EM seinast, og tær royndirnar kunnu vit taka við okkum nú. Og so vita vit eisini hvat fyri tempo, tað skal spælast í, fyri at hava ein møguleika til slíkar dystir til EM. Vit eru klárir yvir, at tað verður eitt annað niveau, enn hvat mann er vanur við til kvalifikatiónsdystir annars, sigur Pauli Jacobsen.

At tveir venjingardystir móti Italia vóru á skránni um vikuskiftið var eisini læruríkt fyri føroysku spælararnar.

- Tað er gott, at mann fær eitt lið sum Italia á vitjan, tí teir koma eisini við tí fysikkinum og tí ferðini, sum skal til, og tað er eisini gott, tí teir spæla sum onkur av mótstøðuliðunum í Norra, sigur Helgi Hoydal.

Í morgunsendingini greiddu teir tríggir landsliðsleikararnir um fyrireikingarnar, nú ferðalagið fer til Oslo mikudagin.

Í bólki D eru umframt Føroyar eisini Slovenia, Montenegro og Sveis.

Fyrsti dysturin hjá Føroyum verður spældur fríggjadagin.