Trump vil hava kjarnorkuavtalu við Iran

Amerikanski forsetin, Donald Trump, hóttir við at leypa á Iran, vil Iran ikki gera avtalu við USA um kjarnorkuvápn.

Tað skrivar Trump á sínum sosiala miðli, Truth Social.

- Vónandi vil Iran skjótt koma til samráðingarborðið at samráðast um eina rættvísa og rímiliga avtalu - EINGI KJARNORKUVÁPN - eina avtalu, sum er góð fyri allar partar. Tíðin gongur undan, tað hevur avgerandi týdning, skrivar Trump, forseti, í fráboðanini á Truth Social.

Vísandi til amerikanska álopið á trý iransk kjarnorkuverk í juni í fjør, skrivar Trump í fráboðanini, at:

- Næsta álopið verður nógv verri! Lat ikki tað henda aftur!

Fleiri herskip á veg

Í einari røðu í nátt segði Trump, forseti, eisini, at fleiri krígsskip hava sett kós ímóti Iran, skrivar norska kringvarpið, NRK.

Iranski uttanríkisráðharrin, Abbas Araqchi, sigur seg ikki hava verið í sambandi við serliga sendimannin hjá USA, Steve Witkoff, seinastu dagarnar og hevur ikki biðið um samráðingar, skrivar tíðindastovan Reuters.

Trump hevur fyrr hótt við hernaðarligum álopum, eftir at iranskir myndugleikar seinastu vikurnar hava bart niður mótmælisfólk, sum byrjaðu at mótmæla iranska stýrinum 28. desember.

Mett verður, at túsundtals iransk mótmælisfólk eru dripin.

Sambært mannarættindafelagsskapinum, Human Rights Activists News Agency (HRANA), sum heldur til í USA, eru í minsta lagi 6.126 fólk dripin í Iran, og talið kann vera nógv størri.