Einabúgvin Mikkjal farin

Tað vakti ans, tá Tórður Mikkelsen var á túri í Grønlandi í 2021 og vitjaði einabúgvan Mikkjal Lodmund Sørensen á oynni Kingitoq í Suðurgrønlandi.  

Mikkjal, ið tá var 86 ára, var ættaður av Viðareiði og fór til Grønlands á vári í 1964 at rógva út og hevur ongantíð verið aftur í Føroyum

Í gjáramorgunin andaðist Mikkjal Lodmund Sørensen, sum náddi at fylla 90 ár í desember. 

Hesi seinastu árini búði Mikkjal á ellisheimi í Qaqortoq.

Leygardagin fekk hann ein blóðpropp og varð lagdur inn á sjúkrahúsið og vaknaði ikki aftur.

LES EISINI: Einsamallur á grønlendskari oyggj í 56 ár

Einabúgvin bleiv ein býarmynd

Í Qaqortoq siga tey, at Mikkjal hesi seinastu árini bleiv ein býarmynd, sum øll kendu og vóru góð við.

Eins og í Føroyum hildu tey tað vera sera sjáldsamt, at maðurin hevði klárað at búleikast einsamallur í so mong ár á oynni Kingitoq

Hóast Mikkjal livdi so nógv ár einsamallur, so hevur hann trivist væl á ellisheiminum. Hann kláraði at halda tríggjar føðingardagar har, og hann elskaði at vera miðpunkt, siga tey.

Mikkjal Sørensen, Kingitoq, Grønland

Frítekst tagging: 

Mikkjal Sørensen

Kingitoq

Grønland

Heimið brendi

Árið eftir, at Tórður Mikkelsen hevði vitjað Mikkjal úti í Kingitoq í 2021, brann heimið hjá honum í grund.

Og sjálvt um Mikkjal ætlaði at innrætta seg í seyðhúsinum við síðuna av, endaði tað við at hann kom inn í býin, Qaqortoq, og har hevur hann sum sagt búð á ellisheiminum seinastu árini.

Tórður Mikkelsen, journalistur, gjørdist møtið við einabúgvan Mikkjal ein serlig uppliving. Á Facebook-síðuni hjá Við Tórði á túri skrivar Tórður: 

"Fyri meg hevur vitjanin hjá Mikkjali úti í oynni verið ein tann minniligasta uppliving í mínum yrki. Tað var áhugavert at hitta hendan einabúgvan av Viðareiði, sum var ein so gløggur eygleiðari mitt í náttúruni, og sum hevði varðveitt tað málið viðingar tosaðu, tá hann fór heimanífrá. Burtur úr hesari vitjan komu tvær útvarpssendingar."

Mikkjal, sum fór til Grønlands í 1963 og ongantíð hevur verið aftur í Føroyum, fer til gravar í Qaqortoq hósdagin.

Mikkjal Sørensen, einabúgvi, Qaqortoq

Frítekst tagging: 

Mikkjal Sørensen

Qaqortoq

Einabúgvi

Við Tórði á túri

Grønland

Sendingar og videobrot

Við Tórði á túri-sendingarnar um einabúgvan av Viðareiði kunnu hoyrast á KVF Ljóð ella her niðanfyri: 

HOYR EISINI: Við Tórði á túri: Einabúgvin á Viðareiði (1:2)
HOYR EISINI: Við Tórði á túri: Einabúgvin á Viðareiði (2:2)

Í sambandi við vitjanina, so filmaði Tórður Mikkelsen eisini Mikkjali Lodmundi Sørensen, og hvussu hann livdi út í Kingitoq. 

Tað bleiv sett saman til hetta lítla videobrotið.