Varaforsetin um Grønland: USA hevur fingið nógv meira

Hóast eingin veit enn, hvat er í rammuavtaluni, sum amerikanski forsetin, Donald Trump, gjørdi við aðalskrivaran í NATO, Mark Rutte, um Grønland, visti amerikanski varaforsetin, J. D. Vance, í gjárkvøldið at siga, at USA hevur fingið nógv meira, enn tað hevði frammanundan.

Tað segði hann í samrøðu við Megyn Kelly í The Megyn Kelly Show.

Um fundin herfyri við danska uttanríkisráðharran, Lars Løkke Rasmussen, segði J. D. Vance, at tað var ein góður fundur.

- Men eg skilji als ikki, at evropearar eru so blíðir privat, og at teir fegnir vilja tillagað seg. Alment leypa teir á okkum og siga, at teir ikki vilja samstarva við USA, men tað passar ikki, segði J. D. Vance sambært donsku sjónvarpsrásini TV2.

Varaforsetin vildi tó ikki siga nakað neyvt um, hvat USA hevur fingið.

Lars Løkke Rasmussen og Vivian Motzfeldt

Góð loysn fyri Evropa

- Øll vita, at vit finna eina loysn á hesari støðuni. Eg rokni við, at tað verður ein loysn, sum verður góð fyri Evropa. Tað týdningarmesta er, at tað verður ein góð loysn fyri USA. Men myndin av, at tey ikki hava slakað fyri USA, er ikki røtt, sigur J. D. Vance.

Varaforsetin endurtók orðini hjá forsetanum um, at USA hevur brúk fyri Grønlandi fyri trygdina hjá amerikonsku tjóðini, og hann segði eisini, at tað var órættvíst, at USA skal rinda fyri og hava ábyrgdina fyri øgiliga stórum parti av rakettverjuni hjá NATO.

- Men tað fáa vit einki afturfyri. Tað er ikki rættvíst. USA eigur ikki Grønland og vit fáa ongar fyrimunir. Skal USA verja missilverjuskipanirnar hjá øllum heiminum, so skulu vit hava okkurt afturfyri, segði J. D. Vance sambært TV2.