BirkBlog-ummæli: "Hetta er so gott, at man burdi drýggjað tað"

"Fyrsta eg hugsi, tá knappi vikutímin úr Hoydølum rennur undan er, at hetta er so gott, at man burdi drýggjað tað. Lagt eina víku ímillum og endursent hina fyrru, ella okkurt annað. Hetta fer alt ov skjótt at verða burtur og liðugt, er mín fyrsti tanki, tá klokkan slær og eg síggi, at onnur sending er komin at endanum."

Soleiðis byrjar Birgir Kruse, mentanarmiðlari, sum rekur bloggin BirkBlog, sítt ummæli av øðrum parti av fimm av nýggju tónleikarøðini Hoydalar hjá Kringvarpi Føroya. 

Sendirøðin verður send hvørt hóskvøld klokkan 19.30, men kann eisini síggjast á KVF Sjón, tá tað passar tær. 

Á KVF Sjón er eisini ein síða við eykatilfari, "Hoydalar: Eykatilfar", umframt at tað finst ein temasíða um Hoydalar á heimasíðu Kringvarpsins. 

Anna Lovisa sang seg inn í hjørtunum á Eyðuni Nolsøe og hyggjarunum við sínari útgávu av "Hvítar flykrur" (úr "Hoydalar")

 

Ein súla í heimlia miðlatilboðnum

Tað er eingin loyna Birgir Kruse er hugtikin av Hoydalar, sum var eyðsæð í hasara ummæli av frumpartinum, har Martin Joensen var stjørnan. Birgir Kruse var eisini gestur til upptøkurnar. 

Í øðrum parti er Eyðun Nolsøe stjørnan, og teir seks spírarnir tulkar sangir hjá dugnaliga lagsmiðinum, ið telist millum teir størstu gjøgnum tíðirnar. 

Birgir Kruse er eisini hugtikin av øðrum parti. 

Bjarki sjarmeraði enn einaferð stjørnuna við sínari framførslu av "So nógvar røddir" (úr "Hoydalar)

 

"So nógvir konstruktiónstankar um at ríva niður og byggja nýtt hava verið í umfari á hesum stað, at eg má í ensku orðabókina at sláa upp eitt ítøkiliga byggjandi orð fyri pillar, sum í berandi samleika, og finni súlu, stólpa og steyra. Tað er tað, henda onnur sending í røðini úr Hoydølum varð. Ein súla, stólpi og steyri í konstruktiónini av tí heimliga miðlatilboðnum, sum bara er okkara, tá vit tendra fyri Kringvarpinum. Og tað er ikki nothing. Takk fyri tað."

Les alt ummælið av øðrum parti av Hoydalar á BirkBlog. 

Ein rørdur Eyðun Nolsøe fagnar sprírunum (úr "Hoydalar)