Stuttsøgan er ein bótarmoli av skaldskapi

Tað tekur stutta tíð at lesa eina stuttsøgu, og ofta er bert ein høvuðspersónur, sum er fyri onkrum, ið broytir søgugongdina.

- So ein stuttsøga er sum ein bótarmoli av skaldskapi, har mannnamuran ella sálin oftar verður granskað.  

Tað sigur Oyvør Dam Jacobcen, bókavørður á Bókasavninum við Løkin, sum afturí ár skipar fyri skrivikapping í samband við Mentanarvikuna í Runavíkar kommunu. Uppgávan í ár er at skriva eina stuttsøgu á í mesta lagi 1200 orð á føroyskum, sum ikki er givið út fyrr.  

Skriviskeið gevur kreativan íblástur

Í samband við skrivikappingina verður eisini skipað fyri einum skriviskeiði á bókasavninum, sum Rannvá Glerfoss, BA í ritlist, fer at hava. Rannvá lýsir tekstaslagið "stuttsøgur", sum eina stutta forteljing, ofta við fáum persónum har ein einstøk hending, ein samabrestur ella ósemja broytir okkurt í tilveruni hjá høvuðspersóninum. 

- Hesar "regglur" eru góðar at taka støði í, um ein ikki hevur skrivað stuttsøgur fyrr, men tað ber altíð til at broyta "regglurnar", sigur Rannvá Glerfoss. 

Fyri at luttaka í skrivikappingini skulu stuttsøguhandrit sum wordskjal latast inn umvegis teldupost til Bókasavnið við Løkin: lokin@lokin.fo áðrenn 20. mars kl. 18. Latnar verða 1. og 2. virðisløn á ávíkavist 8.000 og 6.000 kr, umframt serstøk virðisløn til ungt fólk, sum vísir góð evni. Hendan virðislønin er 6.000 kr. Skriviskeiðið er ókeypis, og til ber at tekna seg við at ringja til 590779 ella skriva til lokin@lokin.fo 

Lurta eftir samrøðuni við Oyvør Dam Jacobsen. leiðari á Bókasavninum við Løkin og Rannvá Glerfoss, BA í Ritlist.

Les meira á lokin.fo

Hvat: Kultura
Hvar: Í útvarpinum og á KVF Ljóð
Nær: Mikudagar kl. 17.05 í útvarpinum, og tá tað passar tær á KVF Ljóð