Útróðrarbátur á land í Sjeyndum

Ein útróðrarbátur fór av kós, tá hann kom aftur av útróðri á Norðhavinum í gjárkvøldið.

Um hálvgum níggjutíðina fekk løgreglan í Havn boð um, at ein bátur hevði siglt á land, og hann var farin á land í Sjeyndum, sum er víkin norðast á Streymoynni, norðanfyri Tjørnuvík.

Ein maður var umborð, hann hevði verið til fiskiskap og var á veg til lands, tá hann eftir øllum sólarmerkjum at døma fór heilt av kós og endaði inni í Sjeyndum.

Vanliga fara útrórðarbátarnir til Eiðis at leggja veiðina upp, og tí hevur talan veruliga verið um ein bát, sum er farin av kós. 

Sum skilst fór báturin á land innarlaga í Sjeyndum, og kanska var tað heppið, tí tað er berg fyri, heilt úr Stakkinum og næstan allan vegin inn í Sjeyndir.

Løgreglan sendi Rescue Vón á staðið, men av tí at ættin lá inn í víkina var so ókyrt, at tað bar ikki til at seta fólk umborð á útróðrarbátin.

Boð vóru tí send eftir tyrluni hjá Atlantsflogi, sum heysaði mannin upp og flutti hann á Landssjúkrahúsið. Har varð blóðroynd tikin av manninum, men hon staðfesti bara, at maðurin var púra edrúur.