Janus á Húsagarði: At skriva løg er tað lættasta í verðini

Crowberry Band var settur á stovn í 2015. Bólkurin hevur spælt hópin av konsertum á barrum og festivalum í Føroyum.

Høvuðsmaður er Janus á Húsagarði.

- Eg var nokkso gamal, tá eg byrjaði at spæla, sigur hann. 

- Haldi eg var 33, tá eg keypti eina mandolin, og eini tvey ár seinni byrjaði eg at spæla á barrum, minnist Janus á Húsgarði.

Mynd: Bjarni Árting Rubeksen

Janus kom skjótt eftir tí, og hann vil vera við, at tað er eitt spæl at skriva tekstir og gera løg.

Vanliga setir hann seg við gittaranum og tekur eina akkord. Ofta er tað C ella G, og síðani murrar hann eitt lag. 

Tey koma bóltandi eitt fyri og annað eftir. Tey bestu verða síðani vald.

Nakað tað sama er við tekstum. Janus hevur eina rúgvu liggjandi.


Mynd: Bjarni Árting Rubeksen

Onkuntíð eru vrakaðu tekstirnir tað besta, tí tá ber til at venda aftur og spinna víðari. Mangan fer søgugongdin tá heilt annan veg.

Nógvir evnaríkir tónleikarar hava spælt við Crowberry Band, men manningin er skiftandi og eisini er støddin á bólkinum ymisk.

Tað veldst um, hvat riggar best ávísu løtuna.


Mynd: Bjarni Árting Rubeksen

Hesa ferð er manningin Janus á Húsagarði: sang og gittar, Vinjar Egilsnes Petersen: klaver og Karl Andrias Stórá: gittar.

Tey, ið vilja hoyra meira við Crowberry Band, hava góðan møguleika til tað á fólkatónleikarastevnuni Várfólk, sum byrjar í næstu viku.

Har spæla Janus og tey fleiri konsertir.